رواية عائلة من جهنم الحلقة 8 الثامنة - اروى طاهر المسلاتي

رواية عائلة من جهنم الحلقة 8 الثامنة للكاتبه المبدعه اروى طاهر المسلاتي الشهيره جدا في ليبيا حيث ان هناك بعض الناس لا يعرفون ما هو اسم رئيس ليبيا ولكن يعرفون اروى طاهر المسلاتي الكاتبه ..

وقفت السياره !!...فتحت عيوني نشوف في بحر قدامي
قلبي طاح من الخووف شفت لي غيث يلي كان يدخن ومتكى راسه ع الكرسي ...حاسه قلبي بيطلع مني
قمر:غغ غ غيث...بتقتلني ؟
غيث:شبحلها....للاسف اي
قمر:حطت يديها على فمها...بتقتلني لاني كشفتك انت والمعكرش جدك ولا
حرام عليك انا قاعده صغيره 💔بتقتلني وتلوحني في البحر حتى الدفن متبوش تدفنوني يقعد ياكل فيا الحوت لين نكمل
غيث:ضحك...مأثرين عليك الافلام انتي
قمر:ااااه...مدام ضحكت معناها تبصر
غيث:ولع دخانه....ويتفرج ع البحر يلي قدامه
قمر:علاش جيت هنايا؟
غيث:قعد ساكت فتره طويله بعدين تكلم....مش عارف
في شوي حجات لازم تعرفيهم او بي الاصح مش واضحتلك
قمر:عدلت تقعميزتها وبدت تشوف للبحر....تبي تبررلي كل شي ادير فيه صح زي العاده
غيث:كل شي يدير فيه جدي لصالحنا !
لما منع حد يتزوج من برا كان قرار صح لان نحنا عندنا هلبا اعداء وهلبا ناس طامعين فينا
ونحنا يلي نبوه حد يستر على بناتنا ويصونهم لاخر العمر
قمر:اي لهاذا السبب تقعد تهدد فيهم بحجات اخي
عشان يوافقو على مصلحتهم ...واو صراحه ابهرتني
غيث:نزل عيونه شويه ورجع قامهم....عارف ان الشي هاذا ممكن يقتل احلامهم
لكن مع الايام يتعودو ويعرفو ان الشي هاذا خير ليهم
قمر:اي اكيد لان يلي عافس في النار مش زي يلي عافس في اميه استاذ غيث
غيث:شبحلها...حسب رايك ان هما بس يلي نحرمو؟
قمر:توسعو عيونها...شن تقصد؟
غيث:ابتسم شويه بعدين رجع عقد حواجبه....ولا شي
عيلتنا تكبر يوم بعد يوم والحمد الله مفيش حد محتاج فلوس !
مش مقصرين مع حد وسمعتنا كويسه بين الناس
قمر:قربت شويه...من برا هالله هالله ومن داخل...
غيث:زاد قرب بتحدي....وحتى من داخل هالله هالله
قمر:بسبب افعالك انت وجدك مفيش حد مرتاح في الحوش وبسبب جدك ماتو33ومزال الله يعلم قداش في واحد بيموت !...وانت الشي هاذا عارفه كويس ياغيث واكبر دليل انك جاي تحاول تقنع فرخه زيني !
وهيا الحقيقه ان تبي تقنع روحك لا اكتر مش تقنعني انا
غيث:متكي ع الكرسي ويشوف لعيونها بدون ما يتكلم
قمر:توترت لما يشوفلها ومردش....قعمزت ووجهت عيونها لروشن ....يالله
بكيفكم مدخليش انا ...ماما اليوم كلمة خالي واكيد بيجي ياخذنا
غيث:ولع السياره ...ابتسم وهوا يحكى داخله
برا الحرش مستحيل نخليك تطلعي لو كلفني الشي هاذا عمري كله!!
كانت قمر شي جديد غريب وحلو في حياة غيث !!
نضرات التحدي في عيونها طولة لسانها وكيف واخده راحتها في الكلام وحتى تهزب فيه مرات بدون خوف!
كان يقدر يسكتها من اول مره لكن كان يستمتع لما تبدا تحكي بدات لما تبدا معصبه

________________________

صالحه:هدى..ارجعي
هدى:بنحط الغدي ع النار
صالحه:خلي راضيه وصالحه هما يديروه تحركي اطلعي برا مع الناس
هدى:حاضر مرت عمى
راضيه:والله ولقت فرصه اليوم بتقطعنا غدي وغسيل وكنيس كل شي فوق روسنا
جليله:احمدي ربك جت على هكي ...انا خايفه تكون محضرتلنا عقاب اكبر من هاذا
راضيه:لوحت الكوب...انا تعبت الجو هاذا معش يمشي معاي من الاخير ره خلاص
جليله:وشنو بديري يابعدي شداتك تخنبي في ذبها بي التابت
راضيه:افففف بس كان يجيني حد يطلعني من العيله هادي كلها ويريحني
جليله:ههههههههه عطيك السلامه ضحكتيني
راك بي صغارك مش مراهقه يامرا
راضيه:تلعب بخصلة شعرها....مرات يصير الشي هاذا وين تعلمي
جليله:بي استهزاء...به به اغسلي الماعين وانتي ساكته يكون احسنلك

____________________

قمر:فتحت الباب .....هي نخليك توا سلامات
غيث:مدلها فلوس...خوذي افطري
قمر:خذتهم منه وقربت...بالك تسحابني بنقولك لا ؟
والله لما نجردك قبل ما نمشي لشرق كان قدرت حتى سيارتك ماهي قاعدتلك
غيث:ابتسم ع جنب...لحقي ع محاضراتك وانتي ساكته
قمر:نزلت وهيا تضحك
غيث:نجردك؟...عليك مصطلحات متقولش عليها بنت
وضحك بعد ما طلع بسياره

_________________________

في الثانويه:-
ياسمين:اسمعي يابنيه
جنى:تلفتت...نعم؟
ياسمين:جديات الكندر يقربلك؟حسيتكم نفس اللقب
جنى:ابتسمت...اي يقربلي انتي من وين تعرفيه؟
ياسمين:منعرفاش ....نتابع فيه ع الانستا فقط
جنى:به كويس...ولفت القدام
ياسمين:نغزتها ع كتفها من جديد
جنى:نعم؟
ياسمين:عادي تجيبيلي رقمه؟
جنى:قامت حاجبها....قدامك دليل الهاتف انا مثلا؟؟؟...شنو الطلب البايخ هاذا
ياسمين:بلاش خيرك قريب هجمتي عليا مقلتلك شي انا
جنى:رجعت لفتت القدام وهيا تردد في خاطرها...مخف امهم البنات الزفت دراهات
بعدين اذكرت للكندر كيف طلع براءت امها ❤️
ابتسمت ونزلت عيونها

في الخيمه:-

جيهان:شن قالك خالي حمدي؟
سُمية : لنقني م حكيتله بالتفصيل...قتله بنغيروا جونا ورايفت عليهن ومن هالسهاري نن قالي تو نجيك الايام هذن يعزي في الراجل لي مات وياخذنامعاه بالمرة
جيهان:اوووه اخيرا
سُمية : لنقنه الايام هذن نسمع في كلام مش عاجبني بكل
جيهان:كلام شنو؟
سُمية : كلام وخلاص ... طلعيهن من راسك الحاجات هذن وتو ركزي على خياتك عينك منهن يابنيتي را معش عندي لهم جهد زي زمان
وانتِ تحقي فـ الحوش معبى شباب أكثر من البنات والوقت كله فـ وجوه بعضنا
جيهان:ولا يهمك ماما بعدين جنى قاعد عقلها طفولي وقمر منو يلي يسترجي يقرب منها وهيا طبعها زي الراجل😂
سُمية : تنهدت...يعلم ربي انه نابيدي مش راضيه على ولد سيدهم يشيلهم ويجيبهم ...منيش واثقة فـ حد
جيهان:سكتت شويه...صح من حقك بس!!
يعني شباب العيله بروحهم وغيث بروحه واضح من نضراته ديما في الارض ومستحيل يحكى ويهدرز هلبا

سُمية : من الجهة هذي صاح صدقتي يابنيتي لكن في الاخر بكل شاب كيفه كيفهم

______________________

ايه:مقعمزه وسط الناس يلي جايه تعزي !
تقريبا كلهم ميعرفونيش جايين يعزو عشان الشامخ وفلوسه!
سبحان الله الدنيا كيف راحت ...يلي عنده فلوس يقيموه فوق روسهم حتى لو مش محصلين منه شي
يلي يخش بيعزيني ينصدم لانى صغيره تعودت على علامات الدهشه في وجوهم !!
سافرت بتفكيري لبعيد ...حياتي الجايه شنو رح ندير فيها؟
معش نبي زواج وجنس ادم كله ...رح نكمل بقوتي ويلي يوقف في طريقي بنمسحه
كمية الضلم والقهر يلي شفتها في بداية حياتي مستحيل نخليها تتكرر مهما صار .

_________________________

قمر:قعمزت ع الدرج وفتحت تالفونها بتتصل بغيث فجآه قاطعها صوت
سماح:حفيدة الشامخ تقوا معانا
قمر:اخلعتيني 😨
سماح:مدت يدها...هاااي انا سماح
قمر:اووه عارفه انك سماح كل ما نتلاقو لازم تعرفيني عليك يعني
سماح:قعمزت جنبها بسرعه....الله جو مكنتش نعرفك انك معانا في الهندسه مريتكش بكل
قمر:اي جيت يوم بس هنايا
سماح:الله رح نكونو صاحبات حتى هنايا
قمر:في داخلها...صاحبات شنو خيرها هاذي؟
سماح:احكيلي هدرزيلي ..شن جوكم في حوش جدك
قمر:ولا شي عاديه الامور
سماح:مستحيل !...معقوله مفيش مضايقات ولا شي
قمر:لا طبعا فيه اكيد بس عادي...مهما كان الايام جايه مسافرين لي الشرق ورح نستقرو غادي
سماح:هههههههه
قمر:ليش تضحكى؟🤨
سماح:ولا شي المهم انا نقرا معاك هنايا لو حتجتي شي خبريني
قمر:ابتسمت بسيف...شكرا

ترن ترن ترن
قمر:ايوا
غيث:ساعه ليا مدرس برا مش خدام بوك انا اطلعي
قمر:محدش ضربك على يدك وقالك تكفل بينا
غيث:به اطلعي بلا لكلك زايد
قمر:ناضت ...ع كلامك هاذا بنقعد نتمشى بشويه علياا
غيث:مش فاضيلك الحوش مقلوب والعزي زخمه هيا اطلعى
سماح:ابتسمت وهيا تتفرج على قمر تتباعد شوي شوي
قمر:تسهووك عزي شنو،..تبي تخوفنى صح؟
غيث:سكر في وجها ً
قمر:طلعت تجري لين وصلت لي السياره ركبت ....منو مات؟😨
جنى:خيرك اهدي
غيث:دور وطلع...خو جدي
قمر:اااه الحمد الله
غيث:شبحلها بصدمه
قمر:اسفه..نقصد عضم الله اجرك نسحابه حد تاني
بس هاذا يعني مشاء الله كمل عمره كله ...حيييي يناري على ايه شنو صاير فيها !
جنى:بصوت واطي خايفه من غيث...افتكت

قدام الحوش :-

مجد:يحكى ع التالفون ومعصب...ترا فوتيني نفختيهم من الصبح زن زن زن
ياسر خلاص....وسكر الخط
الكندر:ماسك تالفونه....خيرها؟
مجد:تسحابه العلاقات كلها حبني ونحبك وهدايا وبس
كندر:امالا العلاقات شنو؟
مجد:كندر بلا تفاها متعك ريحتي
كندر:تي كلهم هكي انت متفهمش العلاقات عباره على حبني بوجودي وبوسلي خدودي
مجد:ضحك وطاحت عينه على بنت خاشه للعزاء شوف شوف
كندر:هاذي لبسة العزي امالا الحفله كيف؟
مجد:هاذي ايمان رمضان بنت جيرانه
كندر:اما رمضان هاذي العيد الكبير
مجد:هههههه
غيث:درس السياره ونزلت قمر بسرعه
مجد:ابتسملها بس هيا مشافتلاش
جنى:اهلين كندر
كندر:بلع ريقه...اهلا شن جو
جنى:قربت ووقفت قدامه...بخير
اليوم بنات يلي معاي طلعو كلهم يعرفوك ويتابعو فيك
كندر:بنات؟شن منعرفش غير الشباب الحق
جنى:اي صدقت...يالله باي
كندر:باي...وحط يده على قلبه
مجد:شنو شعورك وانت مكبد فيها وبتروح لي تركيا وبتخليها لي باقي المزز
كندر:نفس شعورك وانت مكبد في اختها وواخذها منك غيث
مجد:
كندر:عادي خوي عادي
مجد:عارفه عادي ....حسب قانون العيله هيا ليا
وغيث لي اماني اختك
هاذا نضام العمر مفروض يكون هكي
كندر:وهل النضام هاذا ماشي حتى على بنات الشرقاويه ؟؟!!
مجد:سرح شويه يفكر ....

______________________

قمر:حضنت ايه...حبيبتي عضم الله اجرك
ايه:اجرنا واجرك على الله صحيتي
قمر:قعمزت جنبها...انتي كويسه؟
ايه:الحمد الله
جنى:سلامت راسك ايه
ايه:يسلم راسك من السو
قمر:شن بيصير فيك؟؟بتروحي توا ولا كيف
ايه:لا مزال بنقعد فتره هنايا بعدين ساهل
قمر:اهلك وين؟
ايه:اءء اهلى!..اءء
جيهان:قمر نوضي ماما تبيك
قمر:اوكي ...وناضت

__________________

فضت الزحمه ومحدش من العيله بايت لان الميت يعتبر مش من القصر !!
ركبت ايه لي غرفتها وكانت اول ليله في حياتها ترقد براحه بدون عياط وخوف وقرف !!

قمر:وقفت على روشن دارها تتفرج غيث واقف يحكي مع جده
غيث:كيف؟
الشامخ:عطيتك تنبيه للمره الاولى !
واهو قاعد انبه فيك للمره التانيه على خوك خليه ينزل يوري وجها قدام الناس ويقعمز في مجالسنا
من يوم موتة بنت عمك وهوا زي المتوحد حابس روحه
غيث:خذي نفس....مكلمتاش كنت نبيه ياخد وقت منبيش نضغط عليه
الشامخ:ها الايام بديت حنين ومش غيث يلي نعرفه
غيث:مش هكي يا جدي بس انت عارف م...
الشامخ:قام يده...منبيش ها الكلام الزايد ربي خوك احسن ما نربيه انا سااامع
غيث:تم
الشامخ:خش وهوا يعكز بي العصاة متعه
غيث:خذي نفس عميق وقام راسه ...جت عينه في عين قمر❤️
قمر:اتصلت بيه
غيث:رد ع تالفونه وهوا يشبحلها .
قمر:امتى بتركب؟
غيث:يدخن ويشوفلها...علاش السؤال؟
قمر:نبي ناخذ من دارك هلبا حجات لان واضح ان خلاص طلوعنا من الحوش قرب
غيث:ابتسم...وشنو تبي تاخذي بزبط؟
قمر:هلبا حجات ...ولو كنت انت بني ادم كويس راهو خديتك حتى انت معاي
غيث:ضحك...والله!!
قمر:والله تعرف علاش ناخذك؟
غيث:علاش!
قمر:لانك جميل...وضحكتك حلوه ناخدك نفشك بيك على بنات خالي غادي
غيث:ضحك ولوح الدخان.....شوي وراكب
قمر:اشرتله بيدها ...هي تعال
غيث:سكر الخط وهوا يبتسملها

____________________

جيهان:كنت خايفه على زيد ...كلام وكيف مدمر نفسيا
مبكري درت سبلة الحوايج عشان نخش داره وملقيتاش
اليوم من الصبح مريتاش بكل مفهمتش وينه ؟!
جت الساعه 2نفس الموعد يلي تلاقينا فيه مرتين ع السطح
بعد تفكير طويل بدون ما نحس خذتني رجليا لي اخر دور عشان نشوفه
لبست وشاح ع راسي وركبت بهدوء .

______________________

طق طق طق
غيث:ادخل
قمر:خشت وسكرت الباب بشويه ونزلت برنوصها...جيتك😅
غيث:ابتسم....اهلين
قمر:شنو هاذا يلي ادير فيه؟
غيث:نصلح في الريموت متع المكيف
قمر:اهااا
غيث:منزل راسه يفك في الريموت ولاهي فيه
قمر:مركزه في تفاصيل شعره 🔥
غيث:اي ...شنو جيتي بتاخذي مني
قمر:هاذم اول حاجه...اشرت على سماعات
غيث:وشن تاني
قمر:حطت يدها على جهاز النت ...الرمز بس 🙃
غيث:خوذيه كله واطلعي
قمر:ابتسمت...اخخخ بس لو كنت كويس
راهو رضيت حتى نتزوجك 😂
غيث:قام عيونه فيها ..ابتسم❤️ونزل راسه من جديد
قمر:منعطلش عليك توا سلامات ...لو احتجت حاجه قبل ما نسافرو اكيد بنجيك
غيث:هز براسه بدون ما يشوفلها
قمر:طلعت وسكرت الباب

_______________________

جيهان:لمعو عيونها لما شفاته ❤️❤️...الحمد الله انك هنايا
زيد:تلفت متفاجأ...جيهان؟😨في شي؟؟
جيهان:لا بس خفت عليك اليوم كله مش مبين
زيد:كنت عند صاحبي ...وبعدين ركبت زي ما تشوفي بنولع ارقيله كساد منبيش ندير بيها دوشه لوطه
جيهان:به كويس المهم انت بخير
زيد:ابتسملها...صحيتي لانك مهتمه
جيهان:نزلت راسها....ولو
قامت عيونها...تبي شي؟
زيد:سلامتك
جيهان:تمام اصبح ع خير
زيد:تلاقي الخير
جيهان:عطاته بضهر وبتنزل
زيد:اقعدي هدرزي
جيهان:لا اسفه منقدرش اليوم
زيد:اهااا...براحتك
جيهان:نزلت ...كنت تقدر نقعد معاه ونهدرز لعند الصبح بس لا!!
يكفي هكي بنحط حدود بينا كل يلي صار خفت عليه لا اكتر وبس

بعد مرور 5ايام :—🌥🌥

تمت زحمة العزاء نهائي لان زي ماقلت الميت مش من اهل القصر!!
ايه مش مفكره تروح والشامخ بدي عقله يرفع ويجيب يبي يفاتحها في موضوع ورق الورث
وممتلكات خوه ...وفي نفس الوقت بيعطيها مبلغ بسيط عشان تروح وتسكت
وكان الشامخ ضامن 100‎%‎‎ان مش رح تصير اي مشاكل

قمر:كثرت رجلها عند غرفة غيث كل مره جياته بموضوع لدرجة تعود وبدي يستنا فيها امتى تجى
يتناقشو في هلباا مواضيع لما تغلبه في الكلام يرفع يديه وهوا يقول...به خلاص نفختيهم
ولما هوا يغلبها تحط يدها في نصها وتقلب عيونها وهيا تقول...مبردك انا الغبيه ندوي معاك

اما جيهان بدت من روتينها اليومي تركب لي زيد في الليل مرات حتى ادير في قهوا ويقعدو يهدرزو لعند الصبح كل مره في شي وتغيرت نفسية زيد شويه

______________

الكل مقعمزين على سفرة الغدي ❤️
سميه :شرين تالفونها ...ردت حكت كلمتين وسكرت وهيا فرحانه ...قمر خالك برا
قمر:سيبت يلي في يدها وطلعت تجري هيا وجنى
مجد وكندر يشوفو لي بعضهم
والشامخ وغيث يشوفو لبعض .

وفاء:اخيرااا بتقلب وجها
اماني:مفيش زيني بيفرح بي خبر زي هاذا وربي
حوريه:تقصقص من بعيد...معاهم شاب ره
هدى:انطمري قعمزي واسكتي
الشامخ:طلع ووراه غيث

_______________________

قمر:تبوس في خالها...اخيراااا استاحشتكم
حمدي : هههههه خلاص بلا هبال يافرخة كم مرة كلمتكن ڤيديو
قمر:حاضناته وتنقز في مكانها...مش مصدقه اخيراااا😭...وبعدت
سلمت سميه على خوها وجت قمر حضنت ولد خالها
غيث شاف لي مجد
كندر:قرب على خوه...ضاعت عليكم الزوز
بعدت قمر وقربت جنى حضنت ولد خالها
مجد:وعليك حتى انت
الشامخ:اهلا بضيوف تفضلو تفضلو

خش خالهم وولده للمربوعه وخشت جيهان سلمت وطلعت وحطولهم الغدي والضيافه على اكمل وجه اما قمر وجنى قعدو نابتين في خالهم
قمر:ياعمري فهد كبر هلبا
فهد:بطلي يابنت
قمر:تحكى مع ولد خالها بحماس وتضحك وتهدرز
غيث ومجد يشوفولها من بعيد وكل واحد تعابير وجها متتفسرش
حمدي:الله يبارك فيك ياحاج هاذي وصلتنا والله
الشامخ:اهلين بيكم اعتبرو الحوش حوشكم اليوم تباتو هنايا
حمدي:لالا الله يعزك مفيش حد بايت اليوم مروحين جيت نبي نشوف خيتي وبنياتها منبيش انطول واجد وبالمرة نبي ناخذهن لشرق معاي
الشامخ:اشر لي غيث
غيث:قمر خوذي اختك واطلعي
قمر:ليش؟
غيث:اشرلها بعيونه ...طلعت بدون ما تحكي

اريام:بجد؟كيف حبيتيه هكي مسرع انتي تحكيلي ليك شهور بس متعرفه عليه
امينه:متت فيه مش حبيته بس
وفاء:ع شنو تحكو
اريام:اقلبي وجهك من قدامي
وفاء:بسم الله خيرها هادي؟
اريام:مخيرني شي اطلعي من قدام وجهي مش طايقاتك
وفاء:والله انتي يلي جايتينا ره مش حنى قعدتي في خوش راجلك وخلاص
اريام :راجلي معش تجيبي اسمه على لسانك ياخامره ياقليلة الربايه
وفاء:خيرها هاذي ملبوسه ولا شنو ...ياماما تعالي شوفي بنتك
امينه:خلاص اطلعي وفاء تتوحم اختك
وفاء:طلعت بدون ما تتكلم
امينه:اريام اهدي خيرك
اريام:حطت يديها بين راسها ...مش قادره نستوعب ان وحده من خواتي تحكي مع راجلى
امينه:معش شفتي شي عليه؟
اريام:هزت راسها بمعنى لا....حتى الشحن معش يدير فيه قدامي تالفونه طول الوقت عنده
امينه:الله يعينك

_________________________

الشامخ:سامحنا والله ها الطلب ما نقدر عليه
حمدي:كيف؟مفهمتش؟!
الشامخ:بنات ولدي ميطلعوش من القصر هاذا الا وانا ميت
من حقكم خوالهم تشوفوهم وانا حوشي مفتوح ملزيتش حد تفضلو في اي وقت
حمدي:قعد يشوف لي ولده
الشامخ:هاذا اخر كلام عندي ياطيب ولما يغيب الاب ديما العمام اولى مت الخوال
حمدي:تمام فهمت عليك

جنى:مشت بسرعه للكندر لما طلع من المربوعه...كندر قولي شن يحكو داخل
كندر:للاسف مش رح تمشو لي الشرق
قمر:حقيييير كله منه...وباعدت من عليهم
كندر:خيرك زعلانه؟
جنى:تعبت منهم هنايا زهقت حاسه نفسي خلاص شن هاذا 😭
كندر:مسك يدها...تمشي معاي تركيا لما نرجع؟
جنى:توسعو عيونها
كندر:بعد يده...اسف
جنى:تبصر صح؟
كندر:لا ابدا ...تكملي قرايتك برا وتفتكي منهم هنايا
جنى:ضحكت....تجري بيا
كندر:ايوا هكي اضحكي ...وربي ندوي جديات

رِوايـَــــاتْ بـــــَــــنـــو تــِةْ الشــِـــيـــــــخْ

طلع الشامخ من المربوعه وخلا حمدي وولده يرتاحو من الطريق بعد ما شدهم وخلاهم يباتو وتاني يوم الصبح يروحو :-

الشامخ:ناديلي مرت المرحوم للمكتب
مجد:حاضر
الشامخ:خش للمكتب وهوا مقرر داخله ان يحسم القرار اليوم ويرتب حساباته .

قمر:عيونها دموع وقريب تهبل مغلوله وحقد داخلها....الحقير

الحقيررررر هوا وجده
كله منهم الزوز كيف بندير توا مش متخيله حياتي كلها هنايا
والله لما نوريكم وربي اما تشوفو الزوز

سمعت باب غرفة غيث تسكر طلعت بسرعه فتحت الباب وهجمت عليه

____________________

ايه:كيف؟
الشامخ:زي ما سمعتي يا بنتي امتى نحجزلك على .مدينتك باش تروحي؟
ايه:لما ناخذ حقي كامل
الشامخ:اي حق؟
ايه:في الورثه
الشامخ:هههههههه كنت عارف انك داخله على طمه من البدايه...قام صبعه بتهديد اسمعي يابنت قاعده متعرفينيش منو انسيك في حليب امك سااامعه؟متحاوليش تلعبي معاي
بدي يتكلم بهدوء.....بس رح نكون كريم معاك حنعطيك الف الفين تمشي بيهم امورك
ايه:طلعت الورق وهيا مبتسمه....الف الفين اصرفهم على دواك انت وعزوزتك ...انا نتكلم على حق راجلي يلي كتبه بي اسمي
الشامخ:اي حق؟؟؟
ايه:نصف القصر ....يتبع

تحميل

رواية عائلة من جهنم الحلقة 7 السابعة من هنا